PCI THURIN 10 LEH KRISTIAN NUN DAN

--->>> DOWNLOAD <<<---

PENTICOSTAL KOHHRAN HO LEH AN THURINTE

Assembly of God AG: Kum 1914 ah din ani a, tunthleng in member an la tam ber ani. Tunah hian khawvel pumah 64 million vel awm ang a chhut an ni. Hetia an dinhnu lawk hian 1916 ah Oneness penticostal ho chu an chhuak ve leh ta ani.
Kan hriat lar tak Hilsong united te kha he kohhran ami te tho hi an ni a. Milar tak tak Kaka, David Wilkerson, NIcky Cruz tih te kha an kohhran an ni.

AN THURIN TLANGPUI TE
1. Bible hi Pathian thawk khum anih avangin dik lo thei lo ani.
2. Pathian dik pakhat chauh a awm a, trinity ang in a inlan thin.
3. Isua hi Pathian fapa a ni a, minung pahnihna, Pathian tak nisi ani.
4. A tir in mihringte hi tha tak a siam kan ni a, mahsela sual bul avangin Pathian nen kan lo in mihran ta ani.
5. Chhandamna hi Pathian lak a inchhir ngawih ngawihin Isua Krista kaltlangin kan chang thei.
6. Serhhranna pahnih a awm a, ringtute hnimphum a baptisma chantir heihi khawvel zawng zawng a ti tur a phut chu ani. Lalpa zanriah hi ani leh a, heihi Krista tuarna leh thihna kan hriat reng nan ani.
7. Thlarau thianghlim a baptisma chan.
8. Tawnghriatloh a tawng hi thlarau thianghlim hnathawh hmuh theih a lo lang thin chu ani.
9. Tihthianghlimna, hei hian sual lak a hran na leh Pathian hnen a inhlanna a kawk
10. Kohhran mission ah chuan sual a awm mek te chhanchhuah na hi a ni a, kohhran hi Krista taksa ani a, chuvangin tupawh Krista ringtu apiang chu an tel thei ani. Kohhran hi pawlah a innghatlo thung.
11. Thlarau thianghlim kohte leh Bible thu a nemngheh ten kohhran an enkawl tur ani.
12. Tihdamna rawngbawl hna hi damlo te chung ah an beiseina tihsan nan a tihtur ani.
13. Kohhran ten kan kan beisei chu Krista lokal leh hnu a, ropuina a kan awm hun tur ani
14. Chumi hnu ah chuan Krista chu a hring a hran in lei ah hmuh theihin alo kal lang a, lei ah hian kumsang rorel a tan dawn ani.
15. Rorelna hnuhnung ber chu tan a ni ang a, thianghlimna pailo te chuan chatuan hremna an hmachhawn ang.
16. Chumi hnu ah chuan lei thar leh van thar a in tan tawh anga mi dik te chauhin tah chuan hmun an chang tawh dawn ani.

UNITED PENTICOSTAL CHURCH INTERNATIONAL: Hei hian member 4 million vel awm ang a ngaih an ni. Oneness theology zui tute an ni a, Pentecostal Church, Incorporated leh Pentecostal Assemblies of Jesus inzawmkhawmin kum 1945 khan an siam ani a. Khawvel pum huap an ni.

AN THURIN TLANGPUI TE

1. PATHIAN PAKHAT CHAUH A AWM, Pathian fapa Isua tih hi Pathian fapa anga alo channa ani.
2. Chhandamna chungchang , chhandamna bible in a sawi hmu tur chuan thlrau ah an piangthar ngei tur ani a. Hetah hian sual avanga lungngai a thihsan te ani, Isua krista ruala tui a phum baptisma changin thlarau thianghlim baptisma changin kaihthawh in an awm leh a. Hei hi a chianna chu tawng hriatloh hi ani.
3. INCHHIRNA, thinlung tak a inchhir te chauhin Pathian ngaihdamna famkim an hmu thei ani.
4. Isua hmingin hnimphum a baptisma chan tur ani a, hei hian sual ngaihdamna famkim a keng tel ani.
5. Tawng hriatloh a tawng, heihi mi thlarau a an khah leh khah loh a lang a hriattheihna ani.
6. Chhandamna hi Isua khawngaihna a kan rinna vang a lo awm thei ani a. Chumi belhchhah nan a thupek tui ah leh thlarau ah pinthar tur ani tih hi. Mi tumah amah thiltihthat avangin emaw dan zawm that avangin chhandamin an awm dawn lo ani.

LAIRAM ISUA KRISTA BAPTIST KOHHRAN THURIN PUANCHHUAHNA

Lairam Isua Krista Baptist Kohhran chuan Kohhran hmasate thurin dungzuiin, Kohhran mite kaihhruai nan heng a hnuaia thurinte hi a siam a. Kohhran mi zawng zawngte chu heng thurinte hi pawm turin a ngen a ni.

1) Pathian Lehkhabu Thianghlim: Pathian Lehkhabu Thianghlim (Holy Bible), Thuthlung Hlui leh Thuthlung Thar hi Pathian Thlarau Thianghlim thawk khuma ziak, Thu tak leh Thu nung a ni. Pathianin a mite, a chhiahhlawhte hnena a thuchah hriattir a ni. Pathian thute hi zirtirna tha famkim, dik lo thei lo a ni a; chhandamna leh ringtu nun kaihhruaina atan rintlak a ni. Kan rinna, thiltih, nun dan leh ngaihdante tehna dik ber a ni.

2) Pathian: Pathian nung leh dik pakhat a awm a, Amah chu kan Pathian a ni. Pathian chu engkim bul leh tawp a ni. Awm tan ni nei lo, Chatuan mi, danglam ngai lo, Roreltu chungnung ber, engkim siamtu, engkim hria, khawi kipa awm thei a ni. Thu takah te, finnaah te, thianghlimnaah te, hmangaihna leh thatna tinrengah te a famkim a ni. Pathian chu Thlarau a ni a. Amah chauh chu kan rin, innghahna leh chibai kan buk chu a ni.

3) Pathiana Minung Pathum (Trinity): Pathian pakhatah Minung Pathum – Pa, Fapa, Thlarau Thianghlim a awm. Pumkhat an ni a; nihnaah te, famkimnaah te, thiltihtheihna leh ropuinaah te intluk an ni. Chanpual leh hun ruat neiin inrem takin pumkhatin an thawkho a ni.

4) Isua Krista: Isua Krista chu Pathian Fapa mal neih chhun, Pathian inpuanchhuahna famkim a ni. Pathianin khawvelah a rawn tir a. Mihringah lo changin Thlarau Thianghlim thiltihtheihnain nula thianghlim Mari’n a hring a. Amah chu Pathian leh mihring dik tak a ni, sual erawh chu a nei lo. Kan sualte tlan nana inhlanin krawsah khenbehin a awm a, a thi a, phumin a awm a. Ni thum niah Pathian thiltihtheihnain mitthi zing ata a kai tholeh a, Pa Pathian ding lamah a han thu ta a. Chuta tang chuan leiah a lo kal leh ang, mitthi leh minung ro relsak turin.

5) Thlarau Thianghlim: Thlarau Thianghlim chu Pathian a ni a. Pa leh Fapa nena pumkhat, Pa leh Fapa atanga lo awm, Pa leh Fapa aiawh thei, Finna, Hriatna leh Famkimna nei, Pathian chatuan thiltum tihlawhtling tura thawktu, thu hriattirtu leh Thu tak zawng zawnga hruailuttu a ni. A hnathawh chu mite hnena sual nih hriattir te, chhandamna kawng kawh hmuh leh rinna kawnga hruaia Pathian hnen an thlen theihna tura kawng kawhhmuh a ni. Thlarau Thianghlim chuan chhandamna hmu khawpin mite mit a tivar a, Krista chu an Lal leh Chhandamtuah pawm turin a pui a, rinna leh felna rah tinreng nei turin a thawh sak a, mihring chu siamthar a lo ni thei ta a ni.

6) Mihring: Mihring hi Pathianin ama anpuia a siam a ni a, mipa leh hmeichhiaa siam a ni. Pathian pawl tur leh chawimawi tur te; a thu awia, a rawngbawl tura siam a ni. Mihring zawng zawng hi bul hmun khat leh intluk tlanga siam kan ni. Mihring chu suala tlu a ni. Sual bumna avangin mihring chuan ama duhthlanna ngeiin Pathian dan a bawhchhia a, Pathian lakah helin sualah a tlu a ni. Mihring zingah tumah sualna nei lo, mahni intithianghlima inchhandam thei an awm lo.

7) Chhandamna: Krista rin avangin chhandamin kan awm a. Mihring chu amaha inchhandam thei lo a nih laiin, Pathianin a Fapa Isua Krista thihna leh thawhlehna avangin mi zawng zawng tan chhandamna a thlawnin a siam sak a. Mi tupawhin a sualte a sim a, Isua Krista chu Lal leh Chhandamtua pawma a hnung a zui chuan chhandamna chu a chang thei a ni. Chhandamna changtu apiangte chu mahni ta ni tawh lovin, Pathian ta an ni a. Isua Krista duhdan zuiin nun tharin an nung tawh zawk ang.

8) Piantharna: Piantharna hi Krista ringtua nun thar, Thlarau Thianghlim hnathawh avanga lo awm a ni a. Thlarau Thianghlim tanpuinaa Isua Krista chu Lal leh Chhandamtua pawmtu apiangte chu mi piangthar an ni. Mi piangthar chuan tunhmaa ala neih ngai loh nunthar neiin, mihring thar a lo ni a; Pathian faa vuah a ni. A sual thiltih thinte kal sanin, a rilru put dan a lo thianghlim a, a duhzawngte chu Isua Krista duhzawngte a lo ni ta a ni.

9) Rinna: Rinna chu Thlarau Thianghlim tanpuina zara Pathian thutak hriatna leh pawmna atanga lo intan a ni a. Thinlung leh tihtak zeta Isua Kristaa innghahna leh a thu zawm tura inpekna hi a ni. Rinnain miin Pathian a hrefiah tial tial a, Pathian thiltihtheihna leh chakna a chang bawk. Rinna hi thil beiseite awm ngeia hriatna, thil hmuh lohte hriatfiahna a ni.

10) Thianghlimna: Thianghlimna hi Pathian mizia ringtuin a chan a ni a. Piantharnaah a intan a, ringtu nunah Thlarau Thianghlim hnathawh avangin a thang zel a ni. Thianghlimna chuan rilru, taksa, thiltih leh nunphung zawng zawng a huam vek a. Thianghlimna kawnga thanlen nan Pathian thu zawm, tawngtai, mahni invawn fai, insum, Pathian ngaihsak tura insawizawi leh Pathian duhzawng tihtur awm apiangte tih zel a pawimawh.

11) Mi thianghlimte venhimna: Thlarau Thianghlima piangthar dik takte chu Krista nen an inzawm tlat avangin venhim an ni. Pathian thiltihtheihnaa tihchak an ni a, sual leh thlemna chu chhel takin an tuar chhuak thin. An thatna turin engkimin Pathianin a thawhsak tlat a ni.

12) Kohhran: Kohhran chu Isua Krista thisena hrin, ringtute inpawlho, Krista taksa a ni a. Pathianin a chenna tur atana a koh chhuah, Thlarau Thianghlim in a ni. Ringtu zawng zawngte tihtur chu Kohhran insuihkhawma awma Krista thilserh vawn that te, Pathian chibai buk tura inkhawm te, Chawlhni serh te, tawngtai te, mahni inhlan leh rawngbawl nana thilpek hlan te leh Isua Krista thupek anga Krista Chanchin Tha la hre lote hnena hrila Krista hnena mi dangte hruai leh khawvela Pathian ram din hi a ni.

13) Sacrament: Isua Krista din chhuah serhsang (Sacrament) chu Baptismal eh Lalpa Zanriah hi a ni. Baptisma chu ringtuin Pathian leh Kohhranho mit hmuha Isua Krista thihna leh thawhlehna a pawm a ni tih entirnana leh puanchhuah nana Pa leh Fapa leh Thlarau Thianghlim hminga tuia inhnimpilna a chan hi a ni. Baptisma changte chu Isua Krista ringtu, sualte sima Isua Krista Lal leh Chhandamtua pawmtute an ni.
Lalpa Zanriah chu Krista thisen leh taksa kan sualte ngaihdam nana hlan entîr nana chhang leh uain ringtuten kan chanho hi a ni. Krista thuawina te, kan tana a inhlanna avanga lawmthu sawina te, keimahni nun inhlanthar nan te, amah kan pawlna leh a lo kal lehna kan nghahhlelzia lantir nante kan chang a ni. Lal Isua nena Kohhrante kan inpawlhona leh a rawng bawl tura kan inpek zelna tihlanna a ni a. Lal Isua a lo kal leh hma loh chuan kan ti thin tur a ni.

14) Lalpa lo kal lehna: Khawvel hun hi Pathianin a la titawp ang a. Chumi hunah chuan Lalpa Isua Krista chu a mi thianghlimte hruai tur leh rorel turin ropui takin van atangin a lo kal leh ang. Mitthite chu thlan atangin an tho ang. Mi zawng zawng, mitthi leh minungte chu Pathian rorelna hmaah kan la ding ang. Rorelna chu mi fel leh fel lote thliarna a ni ang. Mi fel lote chu thiamloh changin chatuan hremnaah an lut ang a; Krista ringtu, mi felte erawh chu thiam changin chatuan ropuinaah an lut ang.

Mizoram UPC KOHHRAN THUVAWN (Creed)

Mizo
He kohhran thurin leh innghahna bulpui ber chu Bible in chhandamna famkim a tih simna te, sual ngaihdam nana Lalpa Isua hminga tuia hnima in-baptis te leh, Thlarauvin a tawngtir ang zela tawnghriatlohva tawng theihna telin, Thlarau Thianghlim Baptisma hi a ni.
Rinna hmunkhata kan luan za hma chu Thlarauva inpumkhatna kan zawng fovin, inpumkhat lohna thlen thei hiala an ngaihdan inan lohna a inhnial lo hram turin kan unaute chu kan zilhhau tur a ni.

English
The basic Fundamental Doctrine of this Church shall be, there is only one God, His name is Jesus Christ. The Bible standards of full salvation which is repentance, baptism in water by immersion in the name of the Lord Jesus Christ for the remission of sins, the initial of speaking in other tongues as the spirit gives utterance and baptism in the Holy Ghost.
We shall endeavor to keep the unity of the spirit until we all come united in the faith, at the same time admonishing our brethren that they shall not contend for their different views to the disunity of the faith.

Presbyterian Church Of India Thurin

KOHHRAN THURIN SAWM



Thuhmahruai

India Ram Presbyterian Kohhran chuan (Apostol thurin te, Nicea thurin te, Westminster thurin leh Wales Ram Presbyterian Kohhran thurinte chu Pathian thu hrilhfiahna tha tawka ngai a, Kohhran tan leh Pathian thu zirna hmunahte zirtir tlak nia pawm tlat chungin), a hnuaia thurin puanchhuahna thute hi a Pastor te, Probationary Pastor-te, Upate leh Kohhran Dan zawhkimten an vawn ngheh tlat atan a pawm a ni.



THURIN - I

Thuthlung Hlui leh Thuthlung Thar Bute hi Pathian Thu a ni a, heng chauh hi rinna leh thiltih tehna dik lo thei lo a ni.



THURIN - II

Pathian pakhat chauh a awm a, Amah chauh chu biak tur a ni. Amah chu Thlarau, mahnia awm a, hmun tina awm, thlarau dang zawng zawng leh thil dang reng reng laka hrang si a ni a. A miziaah te, finnaah te, thiltihtheihnaah te, thianghlimnaah te, diknaah te, thatnaah te, taknaah te leh hmangaihnaah te tawp chin nei lo, chatuan mi, danglam ngai lo a ni.



THURIN - III

Pathianah chuan mi nung pathum, Pa leh Fapa leh Thlarau Thianghlim an awm a, an pathum hian Pathian pakhat an ni a, nihna thuhmun, thiltihtheihna leh ropuinaa intluk an ni.



THURIN - IV

Lei leh van leh a chhunga thil awm zawng zawng siamtu Pathian chuan mihring hi, hriatna, felna leh thianghlimnaa Ama anpuiin mipaah leh hmeichhiaah a siam a. Mi zawng zawng hi bul thuhmun leh chhungkaw khata unau anga inthui khawm vek kan ni.



THURIN - V

Mihringte chuan anmahni duh thu ngeiin Pathian dan an bawhchhia a, thiam lohna leh chhiatnaah chuan anmahni an inbarh lut ta a. Chu thiam lohna leh chhiatna leh sual hremna ata chu anmahni chhan chhuak tur leh chatuan nunna pe turin hmangaihna tawp nei lo Pathian chuan, A chatuan Fapa neih chhun Lal Isua Krista chu khawvelah a rawn tir a; Ama zarah chauh chuan mihringte hi chhandamin an awm thei a. Chu chatuan Fapa chu mihring takah a lo chang a, mi nung pakhat mize pahnih nei, Pathian tak leh mihring tak a ni kumkhua ta a ni. Thlarau Thianghlim thiltihtheihnain nula thianghlim Mari chuan a pai a, a hring a; mahse, sual a nei lo. Mi sualte tan Pathian dan chu a zawm famkim a, Pathianin dikna a phut hlen chhuak tur leh mihringte Pathian remtir turin, inthawina tak leh famkim atan a inhlan a, kraws-ah a thi a, phumin a awm a, ni thum niah mitthi zing ata a tho leh a. Pathian ding lamah a han chho va, chutah chuan a mite tan a dilsak reng a, chuta tang chuan mitthite kai tho tur leh khawvel rorel turin a lo kal leh ang.



THURIN - VI

Thlarau Thianghlim, Pa leh Fapa ata lo chhuak chuan mihringte chu chhandamna changtuah a siam a, an sualzia leh chungpikziate a hriat chiantir a. Krista hriatna kawngah an rilru a tivar a, an duhthlannate chawk thovin, Isua Krista chu an Lalpa leh Chhandamtua pawm tura ngenin, pawm thei turin a pui a, anmahniah felna rah chi tinreng a thawk chhuak thin.



THURIN - VII

Pathianin Kristaah chuan mi zawng zawng hnenah chhandamna famkim chu a thlawnin a rawn hlan a, an sualte simtir leh Lal Isua Krista chu an chhandamtu atana ring tur te, Amah entawn a, Pathian duh ang taka inngaitlawm leh thianghlima nung tur tein thu a pe a. Krista chu ringa, a thu zawmtute chu chhandam an ni a, sual ngaihdamna te, thiam chantirna te, Pathian fa nihna te, Thlarau Thianghlim chanpuina azara tihthianghlimna te, chatuan ropuina te an chang a. Ringtute chuan tun dam chhung pawhin chhandam nih inhriat chianna lawmawm tak chu an chang thei a. Thlarau Thianghlim chuan khawngaihna hna a thawhin, Thu te, Sakramen te, |awngtaina te hi hmanruaah a hmang deuh bik thin a ni.



THURIN - VIII

Krista din chhuah Sakramen-te chu Baptisma leh Lalpa Zanriah te hi an ni. Baptisma chu Pa leh Fapa leh Thlarau Thianghlim hminga tuia sil a ni. Hei hi Krista nena kan inzawmna te, Thlarau Thianghlim zara piantharna leh tihnunna chhinchhiahna leh nemnghehna a ni a, Lalpa hnena kan inhlanna thiltih a ni bawk. An sualte sim a, Krista chu an chhandamtu atan an ring tih puangtute leh an fate chantir tur a ni.

Lalpa Zanriah chu Krista thihna hriat reng nana chhang leh uain chan ho hi a ni a, ringtuten Krista thihnaa hlawkna an chan chhinchhiahna leh nemnghehna a ni. Ama mite chuan Amah leh a inhlanna an pawmzia te, an hlawkpuizia te, a rawngbawl tura an inpek zelna te, Amah an pawlna leh mi dang nena an inpawlna te entir nan, A lo kal leh hma loh chuan an chang ho thin tur a ni. Sakramen hlawknate chu Krista malsawmna avang leh rinnaa changtuah Thlarauvin a thawh avanga lo awm a ni.



THURIN - IX

Ringtu zawng zawng tih tur chu Kohhran inpawl honaa tel te, Krista Sakramen leh a thil serh dang vawn that te, A dan zawm te, tawngtai zel te, Lalpa Ni serh thianghlim te, Amah be ho tura inkhawm te, A thu hril ngun taka ngaihthlak te, Pathian malsawmna an dawn ang zela hlim taka pek ve thung te, anmahniho zingah leh mi zawng zawng zingah Krista nungchang ang tihlan te, khawvel puma Krista ram tizau tura beih te, ropui taka a lo kal lehna hun nghah te hi a ni.



THURIN - X

Ni hnuhnungah chuan mitthite chu kaihthawhin an awm ang a, mi zawng zawng Krista rorelna thutphah hmaah an lang ang a, he dam chhunga an thiltih that leh that loh ang zelin relsak an ni ang. Ringlote leh mi sualte chuan thiam loh changin an sual hremna an tuar ang; Krista ring a, a thu zawmtute erawh chu a langchanga thiam chantirin an awm ang a, ropuinaa lawm luhin an awm ang.