Mizo hlapui hmasa ber Lalber te Lal ber

Mizo Hlapui hmasaber ‘Lalberte Lalber’ tih phuahtu H.Lama chanchin tawi

Hranglamthanga; H.Lama tih emaw mitdel Lama tih emawa hriat lar tak mai hi kum 1897 buh tuh laiin(May thla vel a nih hmel) Mizoram hmar lam Lengkawt khuaah a lo piang a. Kum 8 anihin Thlangdar-in a mit a zunkhum avangin a mit hi
a del ta a ni.Pianpui unau farnu pakhat chauh a nei a. An naupan deuh laiin a nu leh pa hian thihsanin a pami te chhungin a thih thlengin an enkawl a ni. Zoram hmar lam khaw hrang hranga an pem kual hnuin Kum 1976 Kumthar Ni takin Manipur-a Rengkai khuaah a thi a ni.
Mizo Hlapui hmasaber ‘Lalberte Lalber’ tih hla hi kum 1924, July thlaa Zawngin khuaa a phuah a ni. Chutih lai chuan Vanbawng khuain hla phuah turin an rawn ngen a, an chang thlan chu Thupuan 4:8-a, ‘A thianghlim e, a thianghlim e....’ tih  a ni. A rilruah chu chu a riak renga; tichuan he hla a phuah dan chu hetiang hian a sawi, “Pathian-in Lalberte Lalber’ tih hla min pek lai hian ramhnuaia fianrial tawngtaina ka neih laiin a ni a. Thupuan bu-a ‘Lalpa Pathian Engkimtitheia, Awm tawha leh awm meka leh lo la awm tura chu A thianghlim e, a thianghlim e,’ tih chu ka thinlungah chiang em em in a lo lang a. Van Angel leh Serafim-ten an chawimawite pawh ka ngaihtuah a, ka suangtuahna mitthlain ka hmu,” tiin. A thu a peih hnu chuan  athluk erawh a la nei mai lova. Chumi hnu feah chuan a thluk siam turin khawdai hmun fianrial lungpui chungah thuin a tawngtai leh a, chutih lai chuan Kawlhawk rual hian van dung an rawn thual a, a chung zawnah chuan an thlawk ri ta huau huau mai a. An thla zap ri chu ngun takin a ngaithla a, ngaihnawm a ti em em mai a, chuta tang chuan a thluk leh part hrang hrang in-chord dan turte thlengin a hre chiang thei ta a. Kawlhawk thla zap ri hmangin chu hla thluk chu Pathianin a pe ta  a ni. Kum 1924 July thlaah a thu dawngin kum 1925 April thlaah a thluk nen a zo thei chauh a ni. He hla hian kum 1930 hma deuh atang khan Zoram hi a l o deng chhuak vek tawh a ni. He hlapui bakah hian hlapui chuai thei lo ‘Van indona’ bakah hla dang 20 dawn H.Lama hian a phuah bawk a ni.